( معلش قبل ما ابدأ .. أي تشابه بين اسم القرية و اسم قرية موجودة فعلاً في السعودية فده صدفة تماماً ..... اسم القرية هنا من وحي خيالي تماماً و انا عرفت ان في قرية بالاسم ده فعلاً بعد ما خلصت ...... نبدأ باسم الله )
---------------------------------------------------------
أنا واحد من قرية "مستورة"
قرية "مستورة" بعتاني .... عشان محتاجة مساعدتكوا
أيوة مساعدتكوا ......
أيوة مساعدتكوا ......
في الأول هاحكلكو شوية عن قريتنا
قرية "مستورة" .... قرية اسمها "مستورة"
اهلها شباب و بنات ... شباب و بنات على دين و اخلاق بتميزهم عن باقي القرى اللي حواليهم
أخلاقهم باينة في كل حاجة فيهم: لبسهم, كلامهم, افعالهم, تعاملاتهم
تشوفهم تعرفهم ..... أهل قرية "مستورة"
و زي أي صح ... قرية "مستورة" مسلمتش من اللي حواليها
... من قرية "كاشف"
قرية جنبنا اسمها قرية "كاشف"
ملاها الحقد ناحية قريتنا .. لما عرفوا ان قريتنا باخلاقها تفوقت على كل القرى
و نتائج الحقد في عيون قرية "كاشف" بانت
فاجتمعوا عشان يشوفوا هيوقعوا قرية "مستورة" ازاي ؟!!
- حاسين ان باخلاقهم دي احسن مننا و يتفوقوا علينا !!! ... طب هنبعدهم عن اخلاقهم ....
- طب ازاي ؟
- بُص ... عشان توصل لحاجة من جوه لازم تدخلها من برة الأول
- من برة ؟؟ من برة ازاي ؟؟
- شكلهم .... لبسهم ... نغيرهم من برة
- مممممم ... بس اكيد مش هيسمعولنا .. و مش هيستجيبوا لينا .. دي قرية "مستورة" !!
- لأ ... هيستجيبوا .. بس لو استخدمنا ذكائنا .. مش هنحسسهم بأي حاجة و في نفس الوقت .. نوقعهم ...
- مممممم ... بس مقلناش برضو, هنعمل ايه و ازاي ؟؟!!
- احنا نقدر نصدرلهم ونبعتلهم اللي احنا عايزينه .. بس المهم ميحسوش بحاجة ويحسوا انه عااااادي جداً ...
(و بدأوا يخططوا و يدرسوا المراحل اللي هيمشوا عليها في خطتهم عشان ميحسسوش أهل "مستورة" بحاجة و إنه عااااادي جداً)
- أوصفولي لبسهم عامل ازاي؟
- مين فيهم؟؟
- بناتهم الاول ..
- جيبة واسعة فوقيها بلوزة بكُم و عليها الحجاب , و جذمة برقبة أو مش برقبة بس مقفولة ..
- مممم .. كدة تمام .. كدة الخطة جاهزة .. جاهزين ؟؟؟
يلا نبدأ .. نوقع ..... قرية "مستورة"
(و بدأوا يدسوا سمهم في أهل قريتنا في مراحل مش باين قصدها ...)
قالوا في أول مرحلة:
يا بنات قرية "مستورة", في جيبة جديدة نازلة .. زي الجيبة العادية بالظبط .. بس مصنوعة من الـ "Jeans"
(- بس احنا كدة ولا كأننا عملنا حاجة !!
- ما هو لازم في الأول نقعد فترة .. كام مرحلة كده .. منبينش فرق ... لحد ما يسمعولنا .. و بعدين نغير )
المرحلة اللي بعدها:
هنضيق الجيبة دي شوية بس .. عشان تبقى "Fit" .. بس كدة كدة البلوزة طويلة .. عاااادي جداً
(- مازلنا برضو معملناش حاجة.. )
المرحلة اللي بعدها:
هنقصر البلوزة شوية بس .. على الجيبة مش مشكلة عااادي جداً ...... و هنضيقها بس شوية .. عشان تبقى "Fit" زي الجيبة .. مش معقولة الجيبة هتبقى "Fit" والبلوزة مهرولة !!
(- ما زلنا برضو ... بس يعني تقدر تقول بدأنا شوية ..)
المرحلة اللي بعدها:
هنعمل "جيبة بنطلون" .. هي جيبة قماش عادية بس برجْلين منفصلين عشان تسهل الحركة ... بس كأنها جيبة بالظبط ..
(- طب دي ايه لزمتها؟!!! .. بالعكس دي حلوة و في مصلحتهم !!!
- هتعرف ايه لزمتها ..... )
المرحلة اللي بعدها:
هنضيق "الجيبة البنطلون" شوية بس .. عشان تبقى بنطلون .. و هتبقى من الـ"Jeans" ... و عشان متقلقوش هنلبس عليها البلوزة الطويلة الواسعة
(- مش قلتلك ... اهو مش كلهم وافقوا !!!
- بس اللي وافقوا مش قليلين ... و شوية شوية هيقتنعوا ... هي بس عشان فكرة البنطلون لما اتضيق جديدة ... فترة و هيتعودوا )
المرحلة اللي بعدها:
هنضيق البلوزة على البنطلون .. و هي طويلة عادي .. عشان بس تبقى "Fit" ..
(- كل ده على ما يوافقوا ؟؟!!!!
- ممممم .. و مش كلهم كمان ... مش مشكلة ...
كده حلو ... كدة احنا بدأنا فعلاً )
المرحلة اللي بعدها:
كُم البلوزة .... هنقصروا شوية صغيرين ... و متستغربوش .. هنلبس تحته حاجة تغطي مكان الكُم ....... اسمها "Carina" ... و مفيش فرق .. عااادي جداً
(- وافقوا يا كبير
- أكيد ... ما هو ده الذكاء بقى .. هما وافقوا عشان شافوا ان مفيش فرق بينه و بين الكُم .... مع انه في نفس الوقت مجرد تغيير لون جلد .... اسود, ازرق, بني ... او اي لون .... ده كمان ممكن نعمل لون الجلد نفسه ...... و شوية شوية نقصر الكُم أكتر, طالما الـ"Carina" موجودة خلاص ... هههههههههههههه )
المرحلة اللي بعدها:
مممممممم هنقصر البلوزة شوية على البنطلون .. عشان يبقى شكلها احلى و"Fit" أكتر ....
(- ايه ده !!! ... موافقوش !!! ...
- كنت متوقع ... أصل دي أصعب مرحلة .. و لو وافقوا عليها .. أضمنلك وأوعدك اللي جاي كله سهل .. و هيوافقوا عليه على طول
- المرحلة دي فعلاً .. مرحلة الوقوع ... لو وافقوا .. يبقى وقعوا خلاص .. و يبقى فعلاً وصلنا للي عايزينه ...
- اما نشوف .........
....................................................................
....................................................................
- وافقوا .. وافقوا يا كبير... بعد طول انتظار
- هو اه عدد صغير, بس مع الوقت هيزيد ..
- كده خلاااص ... بقوا يسمعولنا .... ووصلنا للي عايزينه ..
- كده نقدر ننزل بالمراحل اللي جاية ورا بعض .. و هيوافقوا ويستجيبوا
هو اه عدد قليل اللي هنلعب عليه ... بس اللي وصلناله مش قليل )
المراحل اللي بعد كده:
· الجيبة هنقصرها شوية و نلبس "Carina" على الرِجل
· مع الوقت هنقصر الجيبة اكتر طالما تحتيها "Carina" ...لحد ما نوصل انهم يلبسوا الـ"Carina" كبنطلون ......
· هنعمل قماشات جديدة .. منها اللي شبه الـ"Carina" , ومنها اللي مع كل تانية يلمع ..... وأشكال وألوان كتيرة
- ده كله على اللبس ....
- آه .. الجزمة و الحجاب بقى ......
· الجزمة ... هنعمل حاجة اسمها " باليرينا " ... هتبين وش الرِجل ... بس الصوابع و جوانب الرِجل متغطيين ...
وعشان تبقى أشيك و أريح ... هنخليها أخف ... بإننا هنخفف شوية و نخليها مفتوحة خالص .... هنبين الرجل كلها .... بس هنمسك النعل الخفيف بالرِجل عن طريق شريط أو اتنين أو تلاتة على الرِجل ... زي الشبشب ابو صباع كده ... و هتبقى بأشكال شيك ....
· الحجاب ... هنربطه "Spanish" ... مش كده كده الشعر متغطي ؟!! ... يبقى مفيش مشكلة و عااااادي جداً
- طب يا كبير .. ده كله بالنسبة للبنات .... طب الشباب؟؟
- الشباب شغلنا عليهم مش هيبقى كتير وهسيتجيبوا أسرع
· هنخلي التي- شيرتات ماسكة عالجسم عشان تبين العضلات ... (فهيروحوا الجيم عشان يربوا عضلات تبان في التي- شيرت)
· هنخلي التي- شيرتات بربع كُم مش نص ... و مرحلة مرحلة هنخلي التي- شيرتات من غير كُم أصلاً ... كأنه "Cut" بس تي- شيرت
· هنعمل حاجة اسمها " بنطكور" .... و هي عبارة عن بنطلون قصير شوية ... و هنقصره اكتر واكتر لحد ما يبقى شورت ..
- بس ده هيلبسوه في البيت كده !!!
- و في الشارع كمان هيتلبس
- عاش يا كبير
----------------------------------------------
و مرحلة ورا مرحلة ..... و أهل قرية "مستورة" .. شبابها و بناتها .. بيقتنعوا وبيستجيبوا لمكايد و مصايد قرية "كاشف"
بس عشان دي قرية "مستورة" ..... ففي كل مرحلة العدد المستجيب كان بيقل ... منهم اللي متغيرش .. و منهم اللي بيوصل لمرحلة و يقف
بس قدرت قرية كاشف بالذكاء الخادع يستدرجوا عدد من قريتنا
و ما زالوا .. كل مدى و ينزلوا بحاجة جديدة .. هدفهم منها : يضيقوا و يقصروا ... و يضيقوا و يضيقوا .... فيغيروا أهل قرية "مستورة" من بره ... و لما يغيروا من بره هيعرفوا يوصلوا و يغيروا من جوه .... يغيروا الأخلاق اللي ميزت قريتنا .. و يوصلوا للي عايزينه
أهل قرية "مستورة" مبقوش منها .. مبقوش ينفع يقعدوا فيها .... فسابوها و مشيوا
بس من حسن الحظ ... سابوها و جُم عندكوا هنا ... و بقوا في وسطكوا دلوقتي ... و ده اللي خلا القرية تبعتني احكيلكوا القصة دي كلها
من حسن الحظ لأن فيكو نفس أخلاق و دين قرية "مستورة" .. نفس المبادئ و القيم
قرية "كاشف" وصلوا لـ"مستورة" ... بس موصلتش ليكو ........
فعن طريقكو و فيكو عايز اقول حاجة لأهلي .... أهل قرية "مستورة" :
"يا أهلي .... يا أهل قرية "مستورة" .... أنا نفسي أرجع معاكوا ... نفسي نرجع كلنا لقريتنا .. نعمرها من تاني .... الي منكو متغيرش او وقف عند مرحلة معينة ... لسة في القرية ماسابهاش .... بس دول عدد ... مستنيينكوا عشان يكْمَلوا
قرية "كاشف" ضحكوا عليكو ... و دلوقتي فرحانين فيكوا .... بس ميعرفوش اللي انا عارفه و متأكد منه .. ان اللي جواكو لسه جواكو و متغيرش ...
هترجعوا تاني ... و قرية "مستورة" هترجع تاني ....
انا عارف انه مش سهل ... بس واحدة واحدة, هنرجع في المراحل مرحلة مرحلة
انا متأكد في يوم من الايام هنرجع - إن شاء الله - ......."
عايز بقا اقولكوا انتو حاجة:
"انتو باخلاقكو و مبادئكوا .... تقدروا تساعدونا ...تقدروا تساعدوا قرية "مستورة" تتغلب عاللي حصل ... و ترجع ....
فيكو اللي يقدر يساعد بأي طريقة .... يساعد بفكرة ...
ساعدونا ... ساعدوا أهلي ... أهل قرية "مستورة"
و خلو بالكو .. لتطولكوا ايد قرية "كاشف" ... فيكشفوا عنكوا أخلاقكو و دينكو
خلو بالكو ... عُمدتهم حَرفُه تالت حروفُهم ... و هو اللي بيفكر ازاي يقنع ويخدع
خلو بالكو ........."
و في النهاية ...... أنا راجع .... راجع قرية "مستورة"
عشان قرية "مستورة" هتفضل .... مـسـتـورة ......
(تمت)
